Búgin Úkimettiń keńeıtilgen májilisinde Nursultan Nazarbaev jekemenshik bankterge memlekettik qoldaý kórsetýdi toqtatyn ýaqyt jetkenin aıtty.
«BTA bankimen biriktirilgennen keıin aıtarlyqtaı problemany bastan keshirgen júıequraýshy bank «Qazkommersbanki» saýyqtyryldy. Saýyqtyrý nátıjesinde BTA bankiniń kredıtin «Problemaly nesıeler qory» satyp aldy, al «Qazkommersbanktiń» óziniń kapıtaldandyrý mindettemesi strategııalyq ınvestorǵa satyldy. Memlekettik qoldaýdyń arqasynda jalpy somasy 4,5 trln teńgeni quraıtyn halyqtyń depozıti, memlekettik jáne jeke kompanııalardyń qarajattary saqtalyp qaldy», - dedi Ulttyq bank tóraǵasy Danııar Aqyshev otyrys barysynda.
Onyń aıtýynsha, Ulttyq bank elimizdiń bank júıesiniń 28 paıyzyn quraıtyn 5 bankke qoldaý kórsetip otyr. Olarǵa halyqtyń 2 trln teńge depozıti jáne kvazımemlekettik kompanııalardyń 2,2 trln teńge depozıtteri men esepshottary ornalastyrylǵan. Aksıonerlerdiń bankti kapıtaldandyrýǵa yntymaqty qatysýynyń syzbasy uıymdastyrylǵan. Atalǵan bankterge memlekettik qoldaý 653 mlrd teńgeni qurasa, olardyń aksıonerleri 421 mln teńge somasynda kapıtal salýǵa mindetteme alǵan. Sonymen qatar, ol Úkimet pen Ulttyq bank iri bankterdi kapıtaldandyrý sharalary baǵdarlamasyn júzege asyrýdy aıaqtaý týraly sheshim qabyldaǵandyǵyn atap ótti.
«Durys. Birinshiden, bankpen jumys istegisi kelgen aýqatty adamdar olardy memlekettiń esh qatysýynsyz quratyndyǵyn barlyǵyna jarııa etýi kerek. Odan keıin bank sátsizdikke ushyraıdy da, memleket onyń «shalbaryn» ustap turýy tıis bolady. Qurǵan eken ózi sońyna deıin jaýap bersin. Ekonomıkany kredıtteý qoldaýdy talap etti. Ulttyq bank júıe quraýshy bankterge bul qoldaýdy kórsetti», - dedi Nursultan Nazarbaev óz kezeginde.
Sonymen qatar Nursultan Nazarbaev memlekettik turǵyn úı qurylysyn ekinshi deńgeıli bankter qarjylandyrýy tıistigin atap ótti, dep habarlaıdy QazAqparat. «Eki jyldyń ishinde úı salý máselesine memleket 550 mlrd teńge jumsady. Bul qurylysty tikeleı qarjylandyrý. Daǵdarys jyldarynda Jol kartalaryn ázirlegen kezde tıisti qoldaý sharalaryn jasaýǵa bet burdy, ıaǵnı bul durys qadam boldy. Endi osy qarjyny naryqtyq tetiktermen paıdalanýǵa kóshý kerek. Qurylysty bankter qarjylandyrýy tıis, al Úkimet, Ulttyq bank, ákimder baspana qunynyń arzandaýy úshin jaǵdaı jasaýy qajet», - dedi Prezıdent Úkimettiń keńeıtilgen májilisinde. Memleket basshysy osyndaı tizbekpen bıýdjet qarjysyna baqylaý bolatynyn atap ótti. Bankter osy qarjyǵa jaýapty bolyp, ony qaıtaryp, Úkimet aldynda esep beredi.